اخواتي بنات وبس الحلوين
اول مرة انزل موضوع في ركن المطبخ واتمني انه يعجبكوا وتجربوة
وطبعا متنسوش التقييم والدعاء ان ربنا يهديلي ابني ويخليلي جوزي اللهم آمين
الكوسة باللبن اكلة لبنانية جميلة جدا
هيه يمكن غريبة علينا شوية في مصر بس بجد طعمها مميز جدا وجربوها وانشاء الله تحبوها
نبدأ بقة ، بسم الله الرحمن الرحيم
المقادير :1 كيلو كوسة ، 1/2 كيلو لحمة مفرومة ، 2 بصلة متوسطة ، ملح وفلفل ، حوالي كيلو لبن كامل الدسم ، ثوم مفروم حوالي 6 فصوص ، كسبرة ناشفة ، صنوبر للي عندة ،
1/4 كوب كريمة لباني ( اختياري)
حوالي 2 ملعقة سمن بلدي ، 3 ملاعق زيت ذرة او عباد وياريت لو زيت زيتون يبقي احسن واحسن
الطريقة
نبدا الاول نقور الكوسة ونغسلها كويس ، وبعدين نركنها علي جنب لحد ما نعصج اللحمة المفرومة ، نبشر البصل او يتقطع مربعات صغيرة ونشوحة في شوية سمنه لحد ما ياخد اللون الدهبي ، وبعدين نحط اللحمة ونقلب كويس لحد ما تستوي وبعدبن نحط الملح والفلفل الاسود ونسيبها لحد ما تبرد واللي عنده صنوبر يحطة يتشوح مع اللحمة ولو مش متوفر مش مشكلة خالص ، ونبدا نحشي الكوسة لحد قبل الاخر بشوية مش للآخر ، يعني تقريبا 3/4 الكوسة يبقي محشي باللحمة ، اوكي
وبعدين نبدأ نشوح الكوسة في السمن والزيت لحد ما تاخد لون بس مش تتهري ، تشويح بسيط علي البوتجاز لمده 5 دقايق مثلا وتتقلب علي كل الجوانب عشان تاخد لون حلو ونشيلها علي مناديل عشان تنزل الزيت الزياده منها
بعدين نكون مسخنين اللبن وممكن شوية كريمة لباني بسيطة واللي عايزها اخف ميحطش ونسيبها تستوي في اللبن ، هيا مش هتاخد وقت ، وهتعرفي انها استوت لما الكوسة لونها يبقي اخضر فاتح شوية وهتحطي السكينة بالراحة تتأكدي انها استوت - عموما الكوسة مبتاخدش وقت في السوا
وبعد ما تستوي نكون محضرين التوم والكسبرة الناشفة ونحمرها في شوية سمنه ونحطها علي وش الكوسة ونقفل النار زي طشة الملوخية بالضبط
ممكن تعملي معاها طبق سلاطة او ارز بالشعرية للي عايز ، انا بحبها من غير رز عشان تكون خفيفة وبالهنا والشفا ومتنسوش والدعاء والتققم عشان تشجعوني انزلكو حاجات تانية
الأربعاء سبتمبر 21, 2011 9:32 pm
